Course

കേരള സർവകലാശാല ഒന്നാം വർഷ ബിരുദ പ്രവേശനം (2026-27): ഓൺലൈൻ രജിസ്ട്രേഷൻ ചെയ്യുമ്പോൾ ശ്രദ്ധിക്കേണ്ട പ്രധാന കാര്യങ്ങൾ

31/05/2026

Ads

കേരള സർവകലാശാലയിൽ 2026-27 അധ്യയന വർഷത്തെ ഒന്നാം വർഷ ബിരുദ പ്രവേശനത്തിനായുള്ള (Four Year Under Graduate Programmes [FYUGP] Admissions 2026) ഓൺലൈൻ രജിസ്ട്രേഷൻ നടപടികൾ ആരംഭിച്ചിരിക്കുകയാണ്. ഏകജാലക സംവിധാനം വഴി അപേക്ഷിക്കുന്ന വിദ്യാർത്ഥികൾ പ്രവേശന നടപടികൾ സുഗമമാക്കുന്നതിനായി താഴെ പറയുന്ന കാര്യങ്ങൾ പ്രത്യേകം ശ്രദ്ധിക്കേണ്ടതാണ്.

പൊതുവായ നിർദ്ദേശങ്ങൾ

പ്രോസ്പെക്ടസ് വായിക്കുക: ഓൺലൈൻ രജിസ്ട്രേഷൻ ആരംഭിക്കുന്നതിന് മുൻപായി പ്രവേശന പ്രോസ്പെക്ടസ് വിശദമായി വായിച്ചു മനസ്സിലാക്കേണ്ടതാണ്.
കൃത്യത ഉറപ്പാക്കുക: അപേക്ഷാ ഫോറത്തിലെ എല്ലാ വിവരങ്ങളും വളരെ ശ്രദ്ധാപൂർവവും കൃത്യമായും പൂരിപ്പിക്കാൻ അപേക്ഷകർ ശ്രദ്ധിക്കണം.
ഇന്ത്യൻ പൗരന്മാരായ വിദ്യാർത്ഥികൾക്ക് മാത്രമേ ഈ ഏകജാലക സംവിധാനം വഴി അപേക്ഷിക്കാൻ അർഹതയുള്ളൂ. OCI കാർഡ് ഉള്ളവരോ വിദേശ വിദ്യാർത്ഥികളോ ഈ സംവിധാനം വഴി അപേക്ഷിക്കാൻ പാടില്ല. അവർ അഡ്മിഷനായി സർവകലാശാലയിലെ ‘സെന്റർ ഫോർ ഗ്ലോബൽ അക്കാദമിക്സ്’ (Centre for Global Academics) സെക്ഷനുമായി നേരിട്ട് ബന്ധപ്പെടേണ്ടതാണ്.

രജിസ്ട്രേഷൻ നടപടികൾ (ഘട്ടം ഘട്ടമായി)

1. അപേക്ഷാ നമ്പറും പാസ്‌വേർഡും ജനറേറ്റ് ചെയ്യൽ

രജിസ്ട്രേഷൻ നടപടികളുടെ ആദ്യഘട്ടമായി സർവകലാശാലയുടെ ഔദ്യോഗിക അഡ്മിഷൻ വെബ്‌സൈറ്റ് https://admissions.keralauniversity.ac.in/fyugp2026/ സന്ദർശിച്ച് “new REGISTRATION” എന്ന ലിങ്കിൽ ക്ലിക്ക് ചെയ്യുക.
വിദ്യാർത്ഥിയുടെ പേര്, ജനനത്തീയതി (എസ്.എസ്.എൽ.സി സർട്ടിഫിക്കറ്റിലുള്ളതുപോലെ), പരീക്ഷാ ബോർഡ്, രജിസ്റ്റർ നമ്പർ, പാസ്സായ വർഷം (പ്ലസ് 2 മാർക്ക് ലിസ്റ്റിലുള്ളതുപോലെ), ജൻഡർ, നാഷണാലിറ്റി, ഇ-മെയിൽ വിലാസം എന്നിവ നൽകി സബ്‌മിറ്റ് ചെയ്യുക.
അപേക്ഷ സമർപ്പിക്കുന്ന സമയത്ത് വിദ്യാർത്ഥിയുടെയോ രക്ഷകർത്താവിന്റെയോ സ്വന്തം മൊബൈൽ നമ്പർ തന്നെ നൽകണം. ഈ മൊബൈൽ നമ്പറിലേക്ക് വരുന്ന ഒ.ടി.പി (OTP) രേഖപ്പെടുത്തിയാൽ മാത്രമേ അപേക്ഷാ നമ്പറും പാസ്‌വേർഡും ലഭിക്കുകയുള്ളൂ.
വിദ്യാർത്ഥിയുടെ ജനനത്തീയതി dd/mm/yyyy എന്ന ഫോർമാറ്റിലായിരിക്കും ഡിഫോൾട്ട് പാസ്‌വേർഡായി ലഭിക്കുന്നത്. ഇതിനുശേഷം അപേക്ഷാ നമ്പറും പാസ്‌വേർഡും ഉപയോഗിച്ച് പ്രൊഫൈലിൽ വീണ്ടും ലോഗിൻ ചെയ്യാം.

2. അക്കാഡമിക് പ്രൊഫൈൽ രജിസ്ട്രേഷൻ

പ്ലസ്ടു പാസ്സായ വർഷം, ബോർഡ്, രജിസ്റ്റർ നമ്പർ, എത്രാമത്തെ തവണയാണ് വിജയിച്ചത് എന്നിവ കൃത്യമായി രേഖപ്പെടുത്തുക.
ഒന്നിൽ കൂടുതൽ തവണ പരീക്ഷ എഴുതി പ്ലസ്ടു പാസ്സായവർ “Number of Appearances” എന്ന കോളത്തിൽ കൃത്യമായ വിവരം നൽകണം. യോഗ്യതാ പരീക്ഷ പാസ്സാകാൻ എടുക്കുന്ന ഓരോ അധിക ചാൻസിനും ഇൻഡക്സ് മാർക്കിൽ നിന്നും 10 മാർക്ക് വീതം കുറവ് ചെയ്യുന്നതാണ്.
2025-26 അധ്യയന വർഷത്തിൽ കേരള ഹയർ സെക്കണ്ടറി/വൊക്കേഷണൽ ഹയർ സെക്കണ്ടറി (NSQF) പരീക്ഷ വിജയിച്ചവർ രജിസ്റ്റർ നമ്പരും വർഷവും നൽകുമ്പോൾ മാർക്കുകൾ പ്രൊഫൈലിൽ തനിയെ അപ്‌ഡേറ്റ് ആകും. ഇത് മാർക്ക് ലിസ്റ്റുമായി ഒത്തുനോക്കി ഉറപ്പുവരുത്തുക. മറ്റ് ബോർഡുകളിൽ പഠിച്ചവർ മാർക്കുകൾ സ്വയം രേഖപ്പെടുത്തേണ്ടതാണ്.
സംസ്ഥാന ബോർഡുകൾ/ഓപ്പൺ സ്കൂൾ വഴി വിജയിച്ച വിദ്യാർത്ഥികൾ പ്രവേശന സമയത്ത് കേരള സർവകലാശാലയിൽ നിന്നുള്ള തുല്യതാ സർട്ടിഫിക്കറ്റ് (Eligibility Certificate) കോളേജിൽ ഹാജരാക്കേണ്ടതിനാൽ ഇത് മുൻകൂട്ടി കരുതി വെക്കുക.

3. ഓപ്ഷനുകൾ നൽകൽ

ആദ്യഘട്ടത്തിൽ വിദ്യാർത്ഥികൾക്ക് പരമാവധി 20 ഓപ്ഷനുകൾ വരെ നൽകാം.
നൽകിയ ഓപ്ഷനുകളിൽ ഏതെങ്കിലും ഒരു കോളേജിൽ അലോട്ട്മെന്റ് ലഭിച്ചുകഴിഞ്ഞാൽ, ആ ഓപ്ഷന് താഴെയുള്ള മറ്റ് ഓപ്ഷനുകൾ പിന്നീടുള്ള അലോട്ട്മെന്റുകളിലേക്ക് പരിഗണിക്കുന്നതല്ല. അതിനാൽ താല്പര്യമുള്ള കോളേജുകളും കോഴ്‌സുകളും മാത്രം മുൻഗണനാ ക്രമത്തിൽ ശ്രദ്ധയോടെ രേഖപ്പെടുത്തുക.

4. രജിസ്ട്രേഷൻ ഫീസ് ഒടുക്കൽ

ഇന്റർനെറ്റ് ബാങ്കിങ്, യു.പി.ഐ (UPI), ഡെബിറ്റ് കാർഡുകൾ എന്നിവ വഴി ഓൺലൈനായി ഫീസ് അടയ്ക്കാവുന്നതാണ്.
ഫീസ് അടയ്ക്കുമ്പോൾ പണം അക്കൗണ്ടിൽ നിന്ന് നഷ്ടപ്പെടുകയും എന്നാൽ വെബ്‌സൈറ്റിൽ വീണ്ടും ഫീസ് അടയ്ക്കാൻ കാണിക്കുകയും ചെയ്താൽ (Transaction Error), സർവകലാശാല അഡ്മിഷൻ വിഭാഗവുമായി ഫോൺ/ഇ-മെയിൽ/വാട്‌സ്ആപ് വഴി ബന്ധപ്പെട്ട് മറുപടി ലഭിച്ച ശേഷം മാത്രം വീണ്ടും പണമടയ്ക്കുക. മൾട്ടിപ്പിൾ പേയ്മെന്റുകൾ നടത്തിയാൽ തുക തിരികെ ലഭിക്കാൻ കാലതാമസം നേരിടും.

5. ഫോട്ടോയും ഒപ്പും അപ്‌ലോഡ് ചെയ്യൽ

നിശ്ചിത ഫോർമാറ്റിലും വലിപ്പത്തിലും മാത്രമേ ഫോട്ടോയും ഒപ്പും അപ്‌ലോഡ് ചെയ്യാവൂ:

ഫോട്ടോ: 150px X 200px (width x height), പരമാവധി 40kb, jpg ഫോർമാറ്റ് മാത്രം.
ഒപ്പ്: 150px X 60px (width x height), പരമാവധി 40kb, jpg ഫോർമാറ്റ് മാത്രം.

6. വെരിഫിക്കേഷനും പ്രിന്റൗട്ടും

രജിസ്ട്രേഷൻ പൂർത്തിയാക്കുന്നതിന് മുൻപ് നൽകിയ വിവരങ്ങൾ എല്ലാം ശരിയാണെന്ന് ഒന്നുക്കൂടി വായിച്ചുറപ്പാക്കുക. ആവശ്യമാണെങ്കിൽ തിരുത്തലുകൾ വരുത്താവുന്നതാണ്.
ഫൈനൽ സബ്‌മിഷന് ശേഷം അപേക്ഷയുടെ പ്രിന്റ് ഔട്ട് എടുത്ത് സൂക്ഷിക്കുക.

ബി.കോം കോഴ്‌സിന് അപേക്ഷിക്കുന്നവർ പ്രത്യേക ശ്രദ്ധയ്ക്ക്

ഈ അധ്യയന വർഷം മുതൽ ബി.കോം കോഴ്‌സിലേക്ക് അപേക്ഷിക്കുന്നവർക്ക് (B.Com Accounts and Data Science, B.Com Hotel Management and Catering എന്നിവ ഒഴികെ) “B.Com Commerce” എന്ന പൊതുവായ ഓപ്ഷൻ മാത്രമേ തിരഞ്ഞെടുക്കാൻ സാധിക്കൂ.
എന്നാൽ കോളേജ് തിരഞ്ഞെടുക്കുമ്പോൾ അതാത് കോളേജുകളിൽ ലഭ്യമായ ഇലക്ടീവുകൾ (Finance, Co-Operation, Business Information System, Taxation, Logistics And Supply Chain Management തുടങ്ങിയവ) കോളേജിന്റെ പേരിനൊപ്പം കാണാം. വിദ്യാർത്ഥികൾ തങ്ങൾക്ക് ആവശ്യമുള്ള ഇലക്ടീവുകൾ അതാത് കോളേജുകളിൽ ഉണ്ട് എന്ന് ഉറപ്പുവരുത്തേണ്ടതാണ്.

മറ്റ് പ്രധാന വിവരങ്ങൾ

പാസ്‌വേഡ് രഹസ്യമായി സൂക്ഷിക്കുക: പ്രൊഫൈലിൽ മറ്റാരും മാറ്റങ്ങൾ വരുത്താതിരിക്കാൻ അപേക്ഷാ നമ്പരും പാസ്‌വേർഡും രഹസ്യമായി സൂക്ഷിക്കുക. അലോട്ട്മെന്റ് പരിശോധിക്കുന്നതിനും തുടർനടപടികൾക്കും ഇത് ആവശ്യമാണ്.
പ്രിന്റൗട്ട് അയക്കേണ്ടതില്ല: അപേക്ഷയുടെ പ്രിന്റൗട്ട് സർവ്വകലാശാലയിലേക്ക് അയക്കേണ്ടതില്ല. എന്നാൽ പ്രവേശന സമയത്ത് ഇത് അതാത് കോളേജുകളിൽ ഹാജരാക്കണം. പ്രൊഫൈലിൽ എഡിറ്റിംഗ് നടത്തിയാൽ ഏറ്റവും പുതിയ പ്രിന്റൗട്ട് തന്നെ കരുതണം.
സർട്ടിഫിക്കറ്റുകൾ: വിദ്യാഭ്യാസ യോഗ്യത, സംവരണം, ഗ്രേസ് മാർക്ക് എന്നിവ തെളിയിക്കുന്ന സർട്ടിഫിക്കറ്റുകൾ അപേക്ഷിക്കുന്ന സമയത്ത് തന്നെ കൈയിൽ കരുതുക. പ്രവേശനം ലഭിച്ചാൽ സർട്ടിഫിക്കറ്റുകൾ ഹാജരാക്കാൻ അധിക സമയം അനുവദിക്കുന്നതല്ല.
അഡ്മിഷൻ സംബന്ധിച്ച ഏറ്റവും പുതിയ വിവരങ്ങൾക്കായി സർവകലാശാലയുടെ പത്രക്കുറിപ്പുകളും ഔദ്യോഗിക വെബ്‌സൈറ്റും നിരന്തരം പരിശോധിക്കുക.

സഹായങ്ങൾക്കായി ബന്ധപ്പെടാം: