എൻ.ഡി.എ & എൻ.എ പരീക്ഷ: പ്ലസ് ടു കഴിഞ്ഞവർക്ക് പ്രതിരോധ സേനകളിൽ ഓഫീസറാകാം, അപേക്ഷ ജൂൺ 9 വരെ

09/06/2026

233

Ads

നമ്മുടെ നാടിന്റെ പ്രതിരോധ സേനകളിൽ ഓഫീസറാകാൻ പ്ലസ് ടു വിദ്യാർത്ഥികൾക്ക് സുവർണ്ണാവസരമൊരുക്കിക്കൊണ്ട് യൂണിയൻ പബ്ലിക് സർവീസ് കമ്മീഷൻ (UPSC) എൻ.ഡി.എ ആൻഡ് എൻ.എ (NDA & NA) പരീക്ഷയ്ക്ക് അപേക്ഷ ക്ഷണിച്ചു. സൗജന്യ പഠന പരിശീലനത്തിലൂടെ ആർമി, നേവി, എയർഫോഴ്‌സ് വിംഗുകളിൽ കമ്മീഷൻഡ് ഓഫീസറാകാൻ പെൺകുട്ടികൾക്കും ആൺകുട്ടികൾക്കും ഇതിലൂടെ അവസരം ലഭിക്കും.

പഠനം, താമസം, ഭക്ഷണം, ചികിത്സ, പുസ്തകങ്ങൾ എന്നിവയുടെ ചെലവുകളെല്ലാം സർക്കാർ വഹിക്കുന്നതാണ്. കൂടാതെ, മലയാളി വിദ്യാർത്ഥികൾക്ക് സംസ്ഥാന സർക്കാർ നൽകുന്ന രണ്ട് ലക്ഷം രൂപയുടെ സ്കോളർഷിപ്പിനും അർഹതയുണ്ടായിരിക്കും. പരിശീലനത്തോടൊപ്പം ജവഹർലാൽ നെഹ്‌റു സർവകലാശാല നൽകുന്ന ബി.ടെക് / ബി.എസ്.സി / ബി.എ ബിരുദവും വിദ്യാർത്ഥികൾക്ക് ലഭിക്കും.
എൻ.ഡി.എ.യുടെ ആർമി, നേവി, എയർഫോഴ്‌സ് വിഭാഗങ്ങളിലെ 158-ാം കോഴ്‌സിലേക്കും നേവൽ അക്കാദമിയുടെ 120-ാം കോഴ്‌സിലേക്കുമാണ് പ്രവേശനം. 2027 ജൂലൈ ഒന്നിന് കോഴ്‌സുകൾ ആരംഭിക്കും. എഴുത്തുപരീക്ഷ 2026 സെപ്റ്റംബർ 13-നാണ് നടക്കുക.

ഒഴിവുകൾ (ആകെ: 394)

ആർമി: 208 (10 സീറ്റ് വനിതകൾക്ക്)
നേവി: 42 (05 വനിതകൾ)
എയർഫോഴ്‌സ്: 120 (6 വനിതകൾ)
ഏഴിമല നേവൽ അക്കാദമി: 24 (3 വനിതകൾ)

പ്രവേശന യോഗ്യത

വിദ്യാഭ്യാസം: ആർമി വിംഗിലേക്ക് പ്ലസ് ടു പാസായ ഏത് സ്ട്രീമുകാർക്കും അപേക്ഷിക്കാം. എന്നാൽ നേവി, എയർഫോഴ്‌സ് വിംഗുകളിലേക്ക് പ്ലസ് ടുവിൽ മാത്തമാറ്റിക്സ്, ഫിസിക്സ്, കെമിസ്ട്രി എന്നിവ പഠിച്ചിരിക്കണം. അവസാന വർഷ പ്ലസ് ടു വിദ്യാർത്ഥികൾക്കും അപേക്ഷിക്കാവുന്നതാണ്.
വിവാഹേതര പദവി: അപേക്ഷകർ അവിവാഹിതരായിരിക്കണം.
പ്രായപരിധി: 2008 ജനുവരി ഒന്നിനും 2011 ജനുവരി ഒന്നിനുമിടയിൽ ജനിച്ചവരായിരിക്കണം. കൂടാതെ നിർദ്ദിഷ്ട ശാരീരിക യോഗ്യതയും ഉണ്ടായിരിക്കണം.

പ്രവേശന രീതിയും പരീക്ഷാ ഘടനയും

എഴുത്തുപരീക്ഷ, സർവീസ് സെലക്ഷൻ ബോർഡ് (എസ്.എസ്.ബി) നടത്തുന്ന ഇന്റർവ്യൂ എന്നിവ വഴിയാണ് പ്രവേശനം.

എഴുത്തുപരീക്ഷ: ഒബ്‌ജക്ടീവ് ചോദ്യങ്ങളടങ്ങിയ രണ്ട് പേപ്പറുകൾ ഉണ്ടായിരിക്കും. ഓരോന്നിനും രണ്ടര മണിക്കൂറാണ് സമയം. തെറ്റായ ഉത്തരങ്ങൾക്ക് നെഗറ്റീവ് മാർക്ക് ഉണ്ടായിരിക്കും.
പേപ്പർ 1 (മാത്തമാറ്റിക്സ്): 300 മാർക്ക്
പേപ്പർ 2 (ജനറൽ എബിലിറ്റി ടെസ്റ്റ് – ഇംഗ്ലീഷ്, പൊതുവിജ്ഞാനം): 600 മാർക്ക്
പരീക്ഷാ ഫലം ഒക്ടോബറിൽ പ്രസിദ്ധീകരിക്കും. വിശദമായ സിലബസ് www.upsc.gov.in എന്ന വെബ്‌സൈറ്റിൽ ലഭ്യമാണ്.
എസ്.എസ്.ബി അഭിമുഖം: എഴുത്തുപരീക്ഷയിൽ മികവ് പുലർത്തുന്നവർക്ക് രണ്ടാം ഘട്ടമായി നാല് ദിവസത്തിലധികം നീണ്ടുനിൽക്കുന്ന വ്യക്തിത്വ പരിശോധന ഉണ്ടായിരിക്കും. രണ്ട് സ്റ്റേജുകളടങ്ങിയ ഈ പ്രക്രിയയ്ക്ക് 900 മാർക്കാണുള്ളത്. ആദ്യമായി ഇന്റർവ്യൂവിൽ പങ്കെടുക്കുന്നവർക്ക് യാത്രാച്ചെലവ് ലഭിക്കും. ഇന്റർവ്യൂ കേന്ദ്രവും തീയതിയും മനസ്സിലാക്കാൻ www.joinindianarmy.nic.in, www.joinindiannavy.gov.in എന്നീ വെബ്‌സൈറ്റുകൾ സന്ദർശിക്കുക.

പരീക്ഷാ കേന്ദ്രങ്ങൾ

കൊച്ചി, കോഴിക്കോട്, തിരുവനന്തപുരം, കോയമ്പത്തൂർ, മൈസൂർ, ബംഗളൂരു, ചെന്നൈ അടക്കം രാജ്യത്തുടനീളം 86 കേന്ദ്രങ്ങളിൽ പരീക്ഷയെഴുതാം.

അപേക്ഷിക്കേണ്ട വിധം

താത്പര്യമുള്ളവർ www.upsconline.nic.in വഴി 2026 ജൂൺ 9 വൈകിട്ട് ആറ് മണിക്കു മുൻപായി അപേക്ഷിക്കേണ്ടതാണ്.

അപേക്ഷാ ഫീസ്: 100 രൂപ. (വനിതകൾ, പട്ടിക വിഭാഗക്കാർ, സൈനികരുടെ ആശ്രിതർ എന്നിവർക്ക് ഫീസില്ല).
കൂടുതൽ വിവരങ്ങൾക്ക്:
വെബ്‌സൈറ്റ്: www.upsconline.gov.in
ഹെൽപ്പ് ഡെസ്ക്: 011-24041001 / 40303444
ഇ-മെയിൽ: upscosap@nic.in